Tanggal 5 Mei 2014, ponakanku lair, wadon. Sabubare lairan, nalika isih
ana ing Klinik, Bapakne nuli njaluk tulung kanggo golek uba rampe kanggo ngubur
ari-ari. Dudu aku sing golek uba rampe
kui mau, nanging sedhulur liya maneh. Aku ora ngerti sapa sing akhire mendem
ari-ari kui mau, ananging saiki ari-ari kui mau uwis dipendhem ing ngarep omah,
sisih tengen omahe kakangku nganti selapan dinane.
Ari-ari, ing budaya daerahku, Ambarawa lan sak kiwa-tengene, isih
diupakara kanthi permadi. Ari-ari kui mau dikubur bareng karo uba rampe liyane
kayata kembang, dom bolah, potelot, kertas, kaca cermin, kembang boreh, dhuwit, miri, uyah lan kain
mori putih. Sawise dipendhem, tilas pendemane ditutupi lan diwenehi lampu nganti selapan dinane. Babagan upa rampe lan lampu kui mau ana kang
menehi teges dhewe-dhewe, ananging dudu
kui mau sing kepingin tak lelimbang.
Tumrapku dhewe, mendhem ari-ari kui isih dadi pitakonan. Kena apa kudu
dipendem bareng karo ubarampe lan mawa upacara? Ora kok merga ora gelem, nanging aku kepengin
mangerteni luwih adoh maneh. Aku percaya menawa kapitayan lan upacara kaya
mengkono kui mau ana gunane tumrape wong Jawa. Amarga kaya mengkono, aku
kepengin mengerteni sakdurunge nglakoni, lan supaya bisa urun rembug menawa ana
sing takon. Sing luwih kepengin tak
ngerteni yaiku kena apa kok wong Jawa kui ngupakara ari-ari (mbuh dilarung,
dipendhem, lan sakpanungale).
Sakjroning golek pituduh, aku
mengerteni menawa ari-ari kui dianggep
sedhulure enom, adhine, manungsa kang bubar lair. Sedulur tuwane, kangmase sing
lair kui diarani kakang kawah, yaiku banyu
ketuban kang pecah ndisiki bayi kang lair. Antaraning banyu ketuban, bayi lan
ari-ari kui mau dianggep sedhuluran banjur diupakara kabeh.
Ora ming bayi kang diupakara, banyu ketuban lan ari-ari uga banjur
diupakara. Banyu ketuban kang metu ndisiki banjur diwadahi jarik. Amarga banyu
ketuban kui mau nglantarake bayi metu kanthi luwih gampang amarga lunyu, banjur dianggep caraning Gusti
mitulungi bocah kang lair. Menawa bocah
bayine lara, sakwektu-wektu banjur diklambeni jarik kui mau minangka sarana
disambati supaya bayine enggal sehat. Babagan iki, aku ora meruhi kangmasku
madahi ketuban lan nyimpen ana ing jarike.
Adhi ari-ari uga dipakara kanthi permadi minangka sesambatan nalika si
bayi meruhi perkara ing uripe. Mula, banjur dipendhem, dilarung, utawa
digandhulke. Ing zaman saiki, ana sing nyimpen ari-ari kui mau ing bank kaaran
Bank Plasenta. Miturut penelitian, ari-ari utawa plasenta kui pancen salah
sijine sel kang paling migunani kanggo manungsa, utamane kanggo ngobati menawa
kena penyakit.
Kanthi nglelimbang budaya ngrumat ari-ari, banjur katon: kepriye wong
Jawa mengerteni karyaning Gusti ing urip padinan. Srana ari-ari lan ketuban wae, wong Jawa banjur
kelingan marang Gustine. Dudu kok nyembah ari-ari, nanging ari-ari kui banjur
dari srana kelingan maneh menawa Gusti
isa makarya srana kabehing titah.
Sugeng lahir ponakanku: Cathleya! Muga dadi kembang kang endah lan nyunarake
kaendahan ing kiwa tengenmu.
3 komentar:
Cathleya lair 5 Mei ta? wah, bareng ponakanku, tapi ponakanku wis setaun, jeneng'e Kayden :D
hahaha...setahun apa rong tahun?
rong taun Kak Ndes :)) tante'ne lali ki haha #tepokjidat
Post a Comment
Silahkan berkomentar bila ada reaksi setelah membaca tulisan di atas.
Terimakasih.